الفراق انواع

[محمد فرج]

تدري اني صرت بعدك ريشة في وجه ريح
..........................تايهٍ بين اتجاهات الوجودالأربعه
شوفني حدر الظنون الموجعات انهض واطيح
....................... كلما هزت جفوني مزنةالدمع امنعه
اتصبر ولا انا في حسبة الطير الجريح
....................... يوم ثار الملح واقفى سربه وما هو معه
الجناح اقصر من المرقاب والحظ الشحيح
..................... ماتجمَل خانه الله لين ياخذ موقعه
الفراق انواع واقساها تبا العلم الصحيح
................... ساعة اقفى مركب الذكرى ولاحدن ودعه
ساعةٍ لا جت فبالي قلت : وينك يا المريح ؟
..................ماغشاك اللي مشاش القلب ضمه وشْلعه
غرب وشرق بقلبي صاحب الذوق المليح
................. بالغلا قفل عليه وبالمحبه شمَعه
والله اني لو بغيت اوصف شعوري بالفصيح
................ كان قلت : ( أواهُ ما أقسى النوى ما أوجعه ) !
لو بكيفي لجدع شماغي على دربه واصيح
............... يوم ودعني برمش العين واومى باصبعه
بالطريق اللي به القمرا على الغُره تضيح
............... والنفوس عن الطقوس الهينه مترفعه
الوكاد اني احبه لويصد ولو يشيح
......... حبٍ اكبر من حروفي لو بغيت استجمعه

.