[ ظلم المنافي ]

[ناصر حطاب الدهمشي]

السلام عليكم و رحمة الله و بركاته ..
كانت و ما تزال موجهه لشقيقي ... فهد حطاب الدهمشي ..

[ ظلم المنافي ]

هالشعِرْ وسطـه حنينـي و انكسـاري يا فهـد
.......................... حاول إنَّك لا سمعته .. تفهـم اللـي مستـراح

يافهد دنيـاي هـزَّت قلـب مـا عمـره حقـد
.......................... من بياض الغيم لونِـه بـأول خيـوط الصبـاح

نبضته من هول ما بِـه صوتهـا كنِّـه رعـد
.......................... تنفض اضلوع ٍ تدلَّـى بيـن آآآه و بيـن آآآح

لا يغرَّك يوم أغنِّي .. صـدري اضلوعـه بلـد
.......................... للغيـاب و للمنافـي ... للحنيـن و للـجـراح

من كثر ظلم المنافـي دمعـي بعينـي جمـد !
.......................... لا هو اللي ساق عـذره أو تجاهلنـي وسـاح

كنت أهيم و كل ّ وجه إيمرِّنـي لـي بـه سنـد
.......................... كنت مثْل أعظم سحابة لا حكت طـاح القـراح

صرت أسولف للمسافة : رمْلك إشعنـده خمـد!
.......................... وين نبْتِه .. ما أشوفِه ! و إلا شالتـه الريـاح

الله اكبر يـَ اغترابـي وش تبـي منِّـي بعـد!
.......................... ابتعـد طالِبْـك ابحيـا لـو ثوانـي بـارتيـاح

وش تبي بي شف عيوني .. ما بهن غير الرمد
.......................... ياخي ارحل عن طريقي,ايه من عرض اللي راح

كم زرع قلبي آوادِم غيـر طعنـة مـا حصـد
.......................... كمِّ صاحب من عيوني بـاوَّل الفزعات طـاااح

إنجرحت , و لا جرحت , ولا حكيت ابْظهر احد
.......................... مقفي ٍ .. و اصوات حولي تزرق بْظهري رماح

جبت لك همّـي قصيـد ٍ مَذْكـره ليلـة جحـد
.......................... كل ما لاح احتياجي .. جتنـي حروفـه جنـاح

إن تهيَّت لي سعـادة قلـت : مـن جـدَّ وجـد
.......................... و ان تلوَّى بي طريقي قلت : هالممشـى كفـاح

العمر رحلة قصيرة مهـد , و ايـام , و لحـد
.......................... يا نخلِّد بـه رجولـة .. و إلا جِعْلِـه يستبـاح

[ قديمة جدًا و تم تجديدها بروح ثلاثينيَّة ]
لكل عين و روح ستمر من هنا شكرًا من القلب ...
.
ناصر حطاب الدهمشي