مقاطع من جسد !

[صالح الشملاني]

(يَاقَبْر) جيتك عِظَامْ،وكنـت قَبْلَـكْ عِظَـامْ
قضيت عمري مع الحرمان صبر،وصراع

خمسة عشرعام مَرّنْ بي أسى(عام،عـام)
الجوع هدّ الجسد،والفقـر شـلّ الـذراع

حتى تَرَيَّحْت في حضنك وطـاب المقـام
مِنْ بَعْد مَاقِلْـتْ لسنيـن الحيـاه الـوداع

(ياذا الّلحَدْ)ضُمْ ثَـوْبٍ للكفـن فيـه انـام
نومة خلودٍ،بَـلاَ صَحْـوَه:ودون انقطـاع

(وياعتمة القبر)انا مَاخَـافْ هـذا الظـلام
أنا الظلام انخلق مِعْيَـهْ زهـاب ومتـاع

جيت الحياه ابْ(سلام)ورحت منهاابْ(سلام
في رحلةٍ كنت فيها من ضياع الْ(ضيـاع)

مريت فـي خانـة الدنيـا مرورالكـرام
وماكنت اسبب لِ(هالعالم )(أذى أوُصدَاع )

كانت معاناتي اكبر مـن حـدود الكـلام
(قصّه)وممنوعه مـن النشـر والإطـلاع

يَا كِثِرْ مَانِمْت ليل الجـوع اشـدّ الْحِـزَامْ
على وَهَنْ بَطْنِـي الْمَمْلِي(ألَـمْ وَالْتِيَـاع)

كنت اشرب الحزن حتى لحظة الإبتسـام
وافراحنا فـي نـزول وحزننـا بارتفـاع

حتى شَجنْ حَلْمِيْ الـوردي بِعِـزْ المنـام
أشوفني فيه مع فقري (حـروب ونـزاع)

ورغم الفقر،كنت اشوف ان التَّعَفُفْ وِسَامْ
علـى صـدر والـدٍ كَرَامَتُـهْ مَاتُـبَـاع

حتى فطمنـي عليها:قبـل سـن الفِطَـامْ
ورِضَعْتَهَا مِنْ ثدي أمي سنيـن الرضـاع

ياكثر،ماشالـت اكتوفـه أمـورٍ جـسـام
وياكثـر ماقـاوم الدنيـا قَدُرْ،مَااسْتَطَـاع

مثل الجمـل ثـار بحمـولٍ ثقيلـه وقـام
لكن سيـوف الفقر،تكسرعـزوم الشجـاع

ياقبر وش فايـدة كُثْـر العتـب والمـلام
وانا ضحيه لأهل الزور،واهـل الخِـدَاع

أنا،ضحيـة جماعة(كُـلْ حَاجَـه تـمـام)
أهـل الدجل،والْحِيَلْ،والكذب،والإبـتـداع

يَاكَيْف حَالْ الرعيّه(هـي علـى مَايُـرِام)
تظهر بوجه الصلاح وهو مجـرد قنـاع

وانا،ضحيـة تَشَتُّـتْ مجتمـع وانقـسـام
طوائفه بين عالم (هاي هـاي)( ورُعَـاعْ)

أهل الفلل مَاتِحِسْ ابْ(لوعة)اهـل الخيـام
واذن الغني مَايِلاَمِسْهَـا صُـرَاخ الجيـاع

أنا،ضحيـة مثاليـات حَـسْـب النـظـام
وانا،ضحيـة شياطيـن ٍ ذِمَمْهـم وِسَـاع

مُحَرِمِين الحـلال اللـي تُحِـلّ الحـرام
أهــل التَّكَسُبْ/والاسترزاق/والإنتـفـاع

لَوْ،وَصّلّوا صورة الجوعا،عيـون الإمـام
ماكـان يوجـد فقير،ابْ(سكة)الفقرضـاع

وما كان برد الشتا خَلاَّ(ضلوعي حُطَـام)
حتى نَزَعْ روحي الموت ابْ(يدَيْه)انتـزاع

وياشاعري بلّـغ الحييـن مسـك الختـام
أن القبور افضـل بيـوتٍ تضـمّ الجيـاع

عبدالله المـجلاد