تعال / وإنفض غيومي !

[مشاعر تائهة]

ما
عذّبك هالبرد
أو جفّ بك صبرك؟
وش عاد ترجينه
ولو طوّل وقوفك؟
أدري حنينك له امكسّر ٍ ظهرك.
لكن تشوفينه
شايف ولا يشوفك!
شايف ولا يشوفك!
و
مسّوي ولا يشوفك!

.




محتاجتك أبّ ٍ
يمسّح لي دموع
وله قلب ينبض حبّ
( في وسْط صدري)


.

طفلتك ماتت وله
لو تسّلا باللُعب
وفي غيابك هالحنين ينهش بلحم الصبر
دام محنا بأوّله!
لا تعنّيني تعب
كنت أنا لك من سنين بس أدوّر لك عذر

 

[مشاعر تائهة]

مادريت إنيّ صبوره؟
وإن دريت
شوف ما هدّك سوى أصْدق دعاي

ليه غبت
وين رحت
وليه جيت!
أسأله كانت تصّحي بي جفاي

من يقول إنّي بعد بعدك بكيت؟
ولـ جفافي كنت أطرّ الوصل ماي !

جيتني وآنا أفكّر لو مشيت
ياترى منهو معك
أعطي قفاي؟

مادعيت إنّك تجيني بس بغيت
أثبت إنك من يحرّض لك :قساي

جاي تاخذ وأنت أصلاً ماعطيت!
كيف لو معطي ربع يشبه عطاي!

لا تقول إنّك معَ غيري لقيت
شي يشبه هـ (المحبّه لـ أإنتماي)

لا تكابر
لا تكابر
وإن نسيت ؟
شوف ما جابك سوى أصْدق دعاي

 

[مشاعر تائهة]

بيض الله وجه جرحك والطعون
جمّلتني في عيون الحاسدين

خلّت العالم على قلبي تمون
وكبّرتني يا معنّيني سنين

علمتهم وش تكون ومن أكون
وعلمتني أنفث آهاتي حنين

هزّت الدنيا مدامع هالعيون
وطيّحتني يوم لي وجه ٍ حزين

ما وقعت بإيد منهم يتّقون
والمصيبه هالقرابه كافرين

بيض الله وجه جرحي والطعون
خلّدتني في قلوب الحاسدين

 

[مشاعر تائهة]

.
.
.





وعدتيني يا يمّه ما تغيبي
ورحتي انتي مع خيّك وعودك

وصار الحزن من بعدك نصيبي
وعرفت الحين وش معنى وجودك

خلقت بدارك الظلما ( حبيبي )
ولاضقنا فتحنا (دهن عودك)

نشمّك طيب وأحلام اتغدي بي
على حضنك وكفيّك وخدودك

يايمّه بعد عينك من قريبي؟
سوى دمعه تذكّرني بصمودك

حلفتي لي تحطّينك بـ جيبي
وألاقي كل عيد ٍ لي يعودك

فتحت الباب في وقت المغيبي
لان وجهي مثل شمسك ونودك

أهبّ إحساس وأملاهم بطيبي
ويحفظني (دعاك )/ اللي جنودك

كبرت وصرت أشبه لك وعيبي
إلي يومي أطالبكْ بوعودك





ياترى هل بكره أحلى؟

 

[مشاعر تائهة]

ما كذبت إلاّ على هذا الحنين
ياللي عينك مالْمحت صادق وفاي

لاتقول الجرح يا خلّي دفين
أنت أفاك تغار من طيحة أفاي

إن خذلتك والعذر ماهو سمين
ماعليك الوقت بيّن ( وش خفاي )

جاي تاخذ ما بقى من آهتين ؟
ماتت آهي تنتظر تحسبْك جاي

جاي تمسح ما بقى من دمعتين؟
جاي تثني نيّه / تحرّض جفاي؟

دمعتي بعدك إذا كانت تبين
العزا صوتي ولو مبحوح ناي

يطرب العالم بإحساسه إلين:
سالت العزّه على (عطشاك) ماي

تزرع إجحافك بدرب الحب تين
وأجني قلوب ٍ مجوّعها ( رضاي)

صوتي اللي متعبه (قلبي حزين)
وقلبك اللي مفْرحه طيحة أناي

قلبك النسّاي ماهو [بي] سجين
وقلبي الذاكر تركته لك وراي

منهو قدّك بحت لك سرّ الكنين
ومنهو قدّي موتتي سبّة عطاي

اوقف بسكة فراقك مدري وين
أو لمين أروح / يادافن غلاي

طيحة الشجعان من ذلّ السنين
عشتها البارح وأنا أشكي ضماي

من قسمت الخير لأجلك كسرتين
من هلك من تضحياتي لك (سواي)؟

يا صباح التيه بعيون الحنين
أشرقي بكره وغني من غناي

بشّريهم ان جرحي صار دين
وبكره يغثه غيابي لو غثاي :

كاذب وعذره تغنّى تكذبين
ويكسر الخاطر اذا ماهو : معاي

 

[مشاعر تائهة]

متى بتعود؟
متى بتعود؟
وتمسح دمعي الأبيض وتهبّك نود!

متى بتعود؟
نحل جسمي بعد عينك
مثل هالعُود

تغيب شلون!
نشف دمي ولي حيلٍ بعد مهدود

متى بتعود؟
تعبت آخضبّ كفوفي أمل موعود
تعبت أسمّع العالم
لحن موؤود
متى بتعود؟

ثكالى بعدك أحلامي
وأنت شهود!

أهون شلون؟
وأصير العبره لغيري وكلي زود!

متى بتعود؟
تعبت أسهر /
وعندي لك محاجر سود!/
وجع مُعشب / وآهات ٍ تعدّك ذود

متى بتعود
(وله) قلبي بلياّ حدود/ يبيك تعود
متى بتعود / جزاتي منْك
تضيّعني قسى وجحود؟
متى بتعود
تعبت أسأل / يردّ الشوق
.
.
.
مهو موجود
مهو موجود
مهو موجود







من صباحات الأسى حتى هنا / ماتت اللهفه تدوّرلي عليك
من عتيم الشوق ولوعاتي أنا/تنهش جروحي حنين ٍ يحتريك
إحتياجاتي مخليّتك (ضنا )/ وأنت همّك ما تمحور غير فيك
تدري وش سر العنا كل العنا/ما أبي غيرك وماكنّي أبيك!

 

[مشاعر تائهة]

بإحساس جرحي /بحّتي وإختناقي
يسعد صباحٍ ما يجيبك / طريقي

العوق في قلبي مهو كسْر ساقي
وإحتجت لك قلب ٍ صديق وحقيقي

ضيّعتني من طيش/ وش عاد باقي؟
ضاع العمر مابين حزني وضيقي

ومن يوم شفتك غايتك / في فراقي
يا مرحبا في ضيعتي و بـ حريقي

 

[مشاعر تائهة]

تنويه:

ماعندي حساب في الفيس بوك يعني لحد يشوف الأسماء اللي هناك ويحسبها أنا