نهايات ..!!

[نواف التركي]

لا تحبّه ..!!
أقطف اليانع من الشاعر وكبّه ..!!
.
.
لا ارتكبتك عذري إنّك جيتني ذنبٍ أحبه ..!!
وإن جفيتك , دون سبّة ..!!
أعرف أنّي خفت من نفسي عليك ورحت عنّك ..!!
مو لآنّك ..
أو لأنّك ..
لا لـ أنيّ ..
ما أحبّ أكون مثل الناس عادي ..
ولا أحبّ أكون حلمٍ ما تحقق ..
ولا أحبّ أسرقك منّك ..
أقطف اليانع من الشاعر وكبّه ..!!
لا تحبّه ..!!
.
.
أنت مثل الكل ودّك ..
تعرف أكثر ,
ما يهمّك شي كل اللي يهمّك ..
ترمي بدلوك وتخرج ما تيسّر من حديث وتشربه وتروح مبعد ..
ياخي أبعد ..
مابقى فـ البير ما يروي عطشك ولا بقى بي ..
شي يستاهل أصبّه ..
أقطف اليانع من الشاعر وكبّه ..
لا تحبّّه ..
.
.
ما أحب أكون للعابر محطّة ..
أسف إن خانت بك ظنونك ورحت بدون أسف ..
والعواطف ..
وإندفاعك بإتجاه الـ لا مشاعر ..
من هو بس اللي خدعك وقال لك رح حب شاعر ..
لا تحبه ..
أقطف اليانع من إحساسه وكبّه ..

 

[نواف التركي]

لي فـ الغياب أحباب
دام الحضور قبور
لا تقرّب الأغراب
دوم الغريب يبور


ويغفى النور ..
ولا أحسّ الحضور حضور ..
وأحسّ إنّ الغياب أجمل ..


تعال نغيب ..
تعال نروح للأخر ..
تعال أكثر من اللازم ..
تعال وبس ..



تعب ياصاحب الأقلام ..
تعب وأحلامنا ما عادت الأحلام ..
تعب وأكثر مساحات الكلام قبور ..
تعبت أحضر شعر وشعور ..




تفتّش بي قلوب الناس ..
عن الإحساس ..
عن اللي ما وراء الصمت ..
عن الخافي ..
عن الــ ... ولاّ بلاش أحكي ..

تعبت أحكي ..
تعبت أكتب ..
تعبت أكذب ..
تعبت أحضر شعر وشعور ..

 

[نواف التركي]

هذا أنا يا أسماء
تعيشني جروحي
هارب من الأشياء
متوحّد بروحي
أتعمّد الأقصاء
وأستفرد بـ بوحي

هذا أنا ..
أحيان يخذلني الحكي
أحيان يأخذني الحكي
أحيان أحسّ أني طفل وأشاغبك
وألاعبك ..
وأزعل على اتفه سبب

وأحيان أحسّ انّي كبرت بـ هالعمر
وأنّي كذا ملّيتني
وأنّ السنين اللي تمر
ماخلّت بعمري عمر
وأشتاق لـ الأوّل وأحن
وأحسّني مثل السفن
تبحر بعيد مسافرة
وتغيب ضحكتها على كل المواني العابرة
ومكابرة ومكابرة
تخاف لا هبّ الحنين شراعها
تشتاق لأحضان الوطن

لا تعبثين بشاعر أضحى خالي إحساسه من الأحساس
خليه مثل الناس
ينام خالي هم
يصحى ولا يهتم
خليه يا أسماء
هارب من الأشياء
هارب من جروحه
هارب إلى روحه
والسلام
يرفرف بصدره حمام
والسلام يرفرف بصدره حمام

 

[نواف التركي]

وبيرجعون الراحلين ..
بيرجعون ..
ما خانوا الأحباب
لكن يخون الدرب
يا أسرابنا الغيّاب
بكرة تجون مسيّرين ؟
ولاّ الحنين ..
غصنٍ رواه الفقد ..
حتى اينع النسيان ..

وبيرجعون الراحلين ,
بآخر نفس لـ غيابهم ,
وأحبابهم ,
واللي بقى من ذكريات الأمس ,
..
هذا الشعور / النور ,,
يا موقد الظلما ,
ما فـ الحضور حضور ,
ولا بقى بأرواحنا للمقبلين إحساس ,
لو يفهمون الناس ,
إنّ الحديث جروح , وأنّ السكوت الموت , وأنّي مابين الصمت أزرع لصوتي صوت ,,
ماودّي أفقدني ,
يكفيني اللي راح , منّي مع اللي راح ..
سنين أدوّرني ,
مرّة مع اللي الجاي مرّة مع اللي راح ,
وأيّست ألاقيني ,
ولقيتني فيني ..
أحيان ماتدري عن ضيعتك فيك ,
ما عاد أخلّيني ,
يا آنا دخيل الله , لا عاد بي ترحل ..
خلّك هنا وياي ,
ما فـي غيابك خير ..
وبيرجعون الراحلين ؟
مدري مهمّ رجوعهم ..
وإلاّ المهمّ الفقد ,
وأقول ماخانوا ..
لكن يخون الدرب ..
وبيرجعون بخير

 

[نواف التركي]

( ما لهذا الصبر أخر ) ..
ما لـ هذا البحر مينا ..
وشـ بيدّي ..
كل ما رفرف بقلبي حزن
غنّيته ..
كل ما راود عيوني مزن
بكّيته ..
وش بيدّي ..
ما تخيّرت الكلام ولا تخيّرت السكوت ..
ما تخيّرت الحياة ..
بسّ يمكن ..
أقدر أتخيّر أموت ..

لا تمرّ بروحي إلاّ عابر وقلبي معاك ..
لا تمرّ جروحي إلاّ من هناك ..
من بعيد ..
مثل طعم العيد ..
خلّك أبعد من مسافات الطريق اللي مشيت ..
خلّك أبعد ..
ما بقى في دفتري وقت وحنين ..
لو لمحت أنّي حزين ..
لا تجيني ..
خلّني منّي وفيني ..
لا تجيني ..
القلوب أوقات تغريها المواجع ..
وأنت عارف ..
ما بكت عيني فراقك يوم طريّت الرحيل ..
كانت دموعي قصايد ..
كانت جروحي قلايد ..
كل جرح ألبّسه شعري ويفرح ..
شوف كيف أحيان بعض الشعر يجرح ..
رح بعيد ..
ماني راجع ..
القلوب أوقات تغريها المواجع ..
رح بعيد ..
رح بعيد ..

 

[نواف التركي]

كتبتك لين ماعاد الكلام أجمل ..
وبقيت أجمل ..
بقيت أطهر حقير بساحة الـ والي ..
بقيت الطامن العالي ..
وداعاً .. مو لأنّي ما لقيت أحساس ..
وداعاً .. لأن الناس ماهي الناس ..
وداعاً لأني الأجمل ..
وأذا مرّيت بشفاة الحديث وغنّت الذكرى ..
أذا جابتني الصدفة ..
بربّك شف لها صرفة ..
وقلّ لليل ياعمّي خلاص أنسى ..
وقلّ للفجر ..
ترا جينا من اقصى العمر ..
ندوّر للتعب مرسى ..

ورحت ولا بكى صاحب ..
ولا بنت أرخصت دمعة ..
كذا يمشي الغريب بسكّة التيه الطويل ولا معاه أحباب ..
كذا هي سيرة الغيّاب ..
يا آخر ضحكةٍ مرّت ببال الدمع قبل أرحل
أنا مغرور من يومي ..
أنا من خلقتي أجمل ..
أذا مرّة حكيت لعابرين الدرب ..
إذا ليلة ضعفت وقلت ..
فأنا فالغالب الأبعد ..
عطيني قلبي أسرفتي وأنا ما عاد أبي أصبر ..
صبرت أكثر من المعقول ..
ضعفت أكثر من اللازم ..
خلاص الحين ماعادت عيونك قبلة الأحلام ..
تعبت أسهر ..
أبي أرتاح ..
ابي عيوني مثل كلّ العيون تنام ..

كتبتك لين ماعاد الكلام أجمل ..
وبقيت أجمل ..
بقيت أطهر حقير بساحة الـ والي ..
بقيت الطامن العالي ..
إلى النسيان يا الأحلام ..
إلى الخذلان يا الأقلام ..
إلى مالا نهاية سارت الأقدام ..
وداعاً لأني الأجمل .

 

[نواف التركي]

من يقول الصدق جنّة ..!!
ماصدق ..
جرّب تعيشه صحيح إنّ كان ودّك ..
شوف كيف يهدّك ..
وأنت ما قصّرت والله العظيم ..
لك بصدري عمر ما تكذب
عشاني ..
كنت أناني ..
كان مفروض أتْركك ترتاح منّي ..
لاتغنّي ..
أكذب .. أكذب ..
حبّ ألعب طيش ..
روح لأحضان الغواني ..
للسواني ..
وأشرب أشرب ..
سوّ كل اللي نهيتك عنّه ..
من يقول الصدق جنّة ..!!
..
لا تغنّي ..
ماذبحني غير صوتٍ أبعثه منّي لـ منّي ..
أسف أكثر من سنينك ..
من تعبْك ..
ومن حنينك ..
وأكثر أكثر أسف ..
كثر ما جرّيتك لشوك الطريق وتمشي ..
كثر ما بللت رمشي ..
كثر ما أهرب فيك من كل السنين الخضر لسنين الجفاف ..
كثر ما نوّاف صادق مع نوّاف ..
من يقول الصدق جنّة !! ما صدق ..
..
رح هذاك الدرب وأصوات الغياب تنادي ..
( يا فؤادى لا تسل أين الهوى
كان صرحا من خيال فهوى
اسقنى واشرب على أطلاله
وارو عنى طالما الدمع روى )
رح هذاك الدرب وأصوات الغياب تنادي ..
مدّ روحك وتتلقفّك الأيادي ..
وأنتبه في يوم تصدق ..
أكذب أكذب ..
وإنّ شعرت بذنب لا تحزن تذكّر ..
أنّك أخر قلب يسقط ..
وأنّ صدقك جمرك ..
وإنّ كذبك خمرك ..
أثمل أثمل , غيب عن كل القناعات السخيفة , عن اساطير الغرام , والحكايات القديمة , والوفاء والصدق وأطباع الكرام ..
لأنّ هي الدنيا ماعادت مستقيمة , لا تكون أنت الوحيد المستقيم , هيم هيم ..
كل وادي غيّ مرّه ..
كل كذبة في طريقك أرتكبها ..
سوّ كل اللي نهيتك عنّه ..
من يقول الصدق جنّة !! ماصدق .

 

[نواف التركي]

أندفعت أكثر من اللازم عليك ..
أدري ..
أدري أدري ..
أدري إنّي جيت كلّي ..
ماتركتك تنتظرني ..
كان مفروض أنْتظرك تجيني ..
لين أحسّ أنّك تبيني ..
لين أحسّ إنّي بقلبك شي ثاني ..
تترك الدنيا عشاني ..
تنتظرني ..
تحتريني ..
وإن غلبك الشوق ما جيتك تجيني ..
.
أندفعت أكثر من اللازم عليك ..
كنت من روحي أبيك ..
كثّر الله خير قلبك ..
قلت لك مرّة إذا تذكر تراني :
ما أعرف أخسرك كلّك ..
بس ما علمّتك أنّي ..
بينكسر بك شيّ مني ..
كثّر الله خير قلبك ..
صرت أعرف الحين لا حبّيت كيف أسوّي ..
صرت أعرف شلون أحب بدون قلب ..
صرت أعرف شلون أحبّ وما أحب ..
صرت أعرف الحين كلّ اللي أبيه ..
برجع لنفسي وأحاسبها عليك ..
ليه كانت معك تضعف ؟
ليه ؟ ليه ؟
وكلّ ليه أحتاج أرشّ بملحها جرحي ويعرف ..
ويتعلّم ..
كيف ما يتركك تقرب ..
كان عندك كاس فرقى هاته ..
وأسقني وأسقيك منّه ..
لين أغنّي :
( أسقني وأشرب على أطلاله
وأروٍ عنّي طالما الدمع روى
كان صرحاً من خيالٍ فـ هوى )
وآتهاوى ..
وأرجع لصمتي الطويل ..
أرجع لحزني القديم ..
أرجع آغنّي لروحي ..
مو طرب لكن أغنّي ..
( مو حزن لكن حزين )
مو حبيب أحّد ولكنّي أحبّ ..
مو بعيد كثير لكنّي بعيد ..
يالله خيره ..
وأنت أشوف عيونك الحلوة بخير ..
طار من غصن المحبين الحمام ..
والسلام ..
والسلام ..