.. آخر إهدائي ..

[قيصر الصخري]

مدخل:
..

يوم عيد القصايد -في فراقك- قلت:
كلّ جرّة ألم وانتي سبايبها

لابسٍ حلم جوخ، وفي يديني شلت
شمعةٍ دوّبت كفي لهايبها

...

آخر إهدائي قصيدة، تنشِعر ما تنكتب
غمّض عيونك وعشها، تكتشف بإنك عذاب

القلم خلّه بحاله،، والحكي كلّه عتب
وانت مع نفسك تخيّل وش خذا قلبي زهاب

لا تعذّر بالزمن،، تبّت يد الفرقى وتب
إنت تدري وش هي الفرقى؟ ولوعات الغياب؟

إنت تدري عن عروق الشوق لا صارت حطب؟
وشبّها الغربي على ذكرك، وكيف القلب ذاب؟

وكيف بعض الليل يسكن في مداهيل الهدب
وكيف سمّيت النجوم؟ وكم وقع منها شهاب؟

وإن سألتيني قبل،، ولّا سألتيني عقب
قلت لك: عيشي قصيدي، لا تهجّين الكتاب


مودتي/ قيصر