أعلن الرفض ... ( مصافحة أولى لقلوبكم )

[عبدالعزيز المخلّفي]

في زمن الشتات والفضاء المكتظ بالغث الشعري وعبث وسائل التواصل أنا سعيد جدًا
أن يحافظ هذا المنتدى على رونقة الخاص بهذه الكوكبة الجميلة ..
وأكثر سعادة بتشرفي بالإنضمام لكم .. آمل أن أقدم شيئًا يليق بالشعر وبكم ..

( اعلن الرفض )


احطب القاف في ليل القصايد وشب
مايدل الحروف بجرهدي الغياب

اشعل الليل صدرك للمواجع رحب
مانسى من تفيّا في ضلوعه وغاب

من قديم الجروح اللي عداها العتب
للجديد الجديد الي كساك ارتياب

تذكر اللي تناسى يالجريح المحب
تطوي العمر مالك غير قلبك زهاب

اتحاشى السؤال الي جوابه صعب
وش بقى غير تطمين الظما بالسراب

أعلن الرفض واقمع خافقك وانسحب
تسمع الريح تصفر وانت في يديك باب

وش تحرى سكوتك لا تحسبه ذهب
في مجاهيل صمتك كم كسرك العذاب

انكر انكر هدوءك عيش هذا الصخب
للمشاعر بعض الاحيان قانون غاب

تبت ايدين حزنك لو تعاظم وتب
كل مسرى جروح وكل وجهة غياب

ادفنُ اللي مضا لك واحضن المرتقب
الامل في حضور الذاكرة مايهاب

ماتبل الاراضي ذكريات السحب
لاترجى ربيعٍ بالفجوج اليباب