[عبدالله العتيبي]

وش هقوتك باللي عضيده تناساه
واصبح مع العربان مثل الجلاوي!
|"|
عقب المعزة ارذل الخلق يشناه
واللي حواه الوقت غير البلاوي
|"|
اي والله ابكي حظي الزفت وانعاه
مدام حظي تالي العمر ثاوي
|"|
ماهي سوالف تمضي ايام واسلاه
اللي بوسط القلب مليون عاوي
|"|
اجر عبراتي من اقصاه لدناه
في هالزمن كلٍ على الجرح قاوي
|"|
اللي مضى قد راح واقفت مطاياه
مير البلاء باللي بقى من خطاوي
|"|
وانا وصلت بحد صبري إلى اقصاه
بالله ياذا الصبر ويش انت ناوي!!
|"|
اللي رحل خِله مع الوقت ينساه
واللي فقد صاحب بديله يخاوي
|"|
لكن فقيد الأب ياكبر بلواه
يشعر بموته والحياة متساوي
|"|
اذا استوى سوقه على الهم خلاّه
وانا تواسى العمر والساق ذاوي
|"|
يابوي انا من غبت من آه في آه
وكم حفرةٍ عديتها بالمناوي!!
|"|
محتاج لك يابوي قلبي بدنياه
عايش بوسط الناس كني خلاوي
|"|
تمضي بي الأيام وأتابع إمضاه
وامشي مع العالم وانا الجوف خاوي
|"|
إحساسي المبهوت لو غار معناه
يكتب على ديوان شعري (شقاوي)