مساء/صباح الخير
تعبت من القهر - تلاوة أولى على عموم السماوات
تعبت من القهر وابرمت عذرك للخُطى واقفيت
تعيش الماضي لحالك ، وتركي عالصبر حالك
رميت في ليل عثراتك نهارك، وانطفت بك "ليت"
وصرت السالفة في فم غيّابك و عذالك
طرا في خاطر غيابك يجيك ويسألك "ما جيت؟"
و يسرق صبرك اليابس و يمسح جرة آمالك
ويسقيك التعب ليلة ويكسر لمبتين البيت
ويهدي باقي احلامك غروبك وانت يغتالك
يـ صدري : ليه تنتابك همومك كل ما مليت ؟!
يـ صدري كم طلبتك بالحزن ما اشوف همّالك؟!
يغنّيك الحنين بنوتته والهم والـ "يا ليت"
يبونك ترجع تشيل الأمان وحلم ما شالك
هزمك الياس وعزومك ثراك وكل ما غنيت
تخونك رجفة شفاتك وتخرب بيت موالك
ذبل صوت الأماني بك وحزنك ما ذبل، عيّيت
تراعي حزن من هدّك غياب ولا بعد جا لك
يـ صدري : باقي الدنيا تدور وباقي التوقيت
ولو تاهت عقارب ساعتك في زحمة احوالك
عبدالله بن سعيد