سلام يالصاحب اللي صحبته تاج على الراس
لولا غلاه ومقامه ما عتبرته تاج راسي
.
.
الصاحب اللي لثوب الطيب والنوماس لباس
الباتع اللي على ضيم الدهر قاطع وقاسي
.
.
الوافي اللي صفا لي من عرفته بدة الناس
ما غيرته المناصب مثل غيره والكراسي
.
.
لاباس يا من شكالي من هوى ليلاه لاباس
ياصاحبي مثل ما قاسيت من دنياك اقاسي
.
.
الشاعر العاشق المحروم مثلك مرهف إحساس
ولا كل من صاح من جرح الهوى يلقي مواسي
.
.
يا مانصحتك وحذرتك عن التفريط بالماس
أخاف من ساعة تحتاج فيها للنحاسي
.
.
شفي على ما مضى لي من ليال بيض منحاس
من قو غبني على ما ضي مضى لي شاب راسي
.
.
مثل الحميدي حرمه الله من الخضرات مياس
فرط وصارت حياته كلها هم وماسي
.
.
يدق صدره على ما فات له مقطوع الأنفاس
العيش عنده من الحرمان والموت متواسي
.
.
وإلا انت توك شباب وطلعتك طلعات قرناس
والصيد راتع ووامن ما عليه من الحساسي
.
.
الصيد ولعه على ما قيل والمقناص نوماس
أتعب لهن لا عدمتك في مشاريف الرواسي
.
.
.
.
الشاعر الكبير
عبدالله السياري
.
.
.
ملاحظه اسند هذه القصيد للشاعر الكبير عبدالله السلوم
.
.
ذعذع وأنا بالجزاير من هبوب الوجد نسناس
وسما بي الشعر وأطلق همته عقب احتباسي
.
.
ما بين هاك السهول الطيبة وجبال الاوراس
قريت خط الرفيق اللي تزايد به حماسي
.
.
من شاعر له بقلبي منزل سوس على ساس
يا ما شكالي هموم يطردن عنه النعاسي
.
.
وإلى بغى يدمج الدعوى ويبعد عنه الأرماس
سوى قضية يبي جوي يجي فيه التماسي
.
.
حاشاك منتب يبو خالد على الغرات بلاس
انت الصفي الوفي ولا تجي درب التباسي
.
.
لاشك من سمع هرجك لبس درع والطاس
وفصل ثياب من البهتان لو ما هي مقاسي
.
.
ما ثور الحرب بين كليب و المقرود جساس
إلا كلام بسيط وصار له راس وساسي
.
.
لا تنصح الناس درب العشق ما به غير الإفلاس
من جنبه صار سالم والمولع به يداسي
.
.
رست سفينة غرامك في مكان ما به او ناس
وإلا الحميدي مسافر ما بعد دور مراسي
.
.
وانا تخيرت عن باب الطمع باب من الياس
ومشيت في الدرب الابلج ما تعرضت الهراسي
.
.
من عاش ما حط بالدنيا دليل وحط نبراس
ما ادرك مرامه وشرب من النكد عشرين كاسي
.
.
.
.
الشاعر
عبدالله السلوم
ملاحظه تمت مجارات القصيدتين من قبل الشاعر الحميدي الحربي
.
.
أنا أشهد إني وقفت بموقف بالحيل حساس
وشلون أجاري بعذب الشعر صعبين المراسي
.
.
زهر المعاني خذوه وجيبت انا للروض عساس
ما قدمي إلا حتات اوراق وغصون يباسي
.
.
أدير الأفكار واضرب بالظنون أرباع وأخماس
واصبحت كني مع التفكير في زايد عماسي
.
.
قصاص جره وضاعت حيلته في عج ودماس
ما عاد شوفه يقدي له ولا يسمع حساسي
.
.
الخالدي والتميمي جددوا بي وجد واتعاس
يوم ادخلوني طواريق لها منا نيب حاسي
.
.
صحيح انا خذت في غبة بحور الحب مرواس
ووصلت شط الأمان وفيه حطيت المراسي
.
.
مابين الابحار والمرسى حصل لي ربح وافلاس
والربح ماهو بمشروع المحبة شرط أساسي
.
.
عشقت وعشقت وانياب المهالب تضرس اضراس
وطلعت منها وثوب الستر والشيمة لباسي
.
.
ايام حلت وزلت والخبر عن حالها ناس
ما قول ياليتها ترجع وانا مانيب ناسي
.
.
الحب وانتم على عرش النقا بأفياه جلاس
لو فات بالروح يبقى له صدى افراح وماسي
.
.
لكن على شان وضعي خففوا من دق الأجراس
تراه يتعبني مجاري صعيبين المراسي
.
.
.
الشاعر
الحميدي الحربي