[أمجاد محمد]

على ذاك الجدار اللي على حد البيوت الطين
.. وقفت وهاجس الذكرى نفض في قلبي غباره

وقفت أطلق مدى شوفي وأناظر مفرق الدربين
.. وأشوف الدار وعيوني تضم الدرب وجداره

أجل هذا الجدار اللي سهر يوم العرب غافين
.. أجل هذا الصديق اللي ذكرته واذكر أسـراره

أنا أذكر يوم يجمعنا يغطينـا برمش العين
.. نسج ليله وسوى به على عشاقه ستاره

حجر لكن احس انه يحسّ بفرحة القلبين
.. أحس انه نفس لكن غدى جامد من أقداره

حجر يوم العرب تنسى اذا مرت عليها سنين
.. حجر يوم العرب تنسى حبيـب(ن) مبعده داره

ولكن الجدار اللي تركته من هـذاك الحين
.. عرفني يوم قابلته وبلل دمعي أحجاره

جلست وهاجت الذكرى وقلت بخاطري مسكين
.. ثمان سنين في وحشـه و لاحـد(ن) منّنّـا زاره

وفاء ذاك الجدار أثبت بأن الآدمي من طين
.. تخيّل يـوم لامسته تنهـد مـن شقا ناره !!!

سألني قال أنا أذكركم تجوني بالظلام اثنين
.. بكيت وقلت صدقني رحل وانقطعت أخباره

,

عوض العنزي