نص مُرْتَجَل و بسيط جدًا .. كُتِبَ بلحظةٍ تبرَّأت من الشعر و اعتنقت الحنين ..
الإهداء لها ..
[ شحوب ]
قالت تنام وقلت : وشلـون انامـا
....................... النوم يا الحرة نسيته لـي اسنيـن
مبطي و صـدري ممتلـي باليتامـا
....................... ستت عشر ضلع ٍ تدلَّى من البيـن
مير ابعدي سَمْعِك علـيَّ الحرامـا
....................... الا ضلوعِـك ترتعـد لـو توحِّيـن
أصواتهـم لامـن غشاهـم هيامـا
....................... على وجهين روَّحت مدري الـْ وين
اوجيـه نـاس ٍ ذِكْرهُـم بالعظـاما
....................... من فارقوا حالي مثل مـا تشوفيـن
شاعر واغنِّي من عروقي كلامـا
....................... القلب يبكي له قبـل تبكـي العيـن
عزَّاه يـَ عْيُـون ٍ بِوجهـي تدامـا
....................... و عزَّاه يا جفن انْزلت دمعته طيـن
يا بنت ياما تهْـت فينـي و يامـا
....................... قصيِّـت للموتـى حكايـات حييـن
رجَّـال جيتـك و المواجِـع تزامـا
....................... في دمعـة ٍ حَلَّفْتَهـا.. لا تطيحـن
تجمَّلـي بـي طيّـر بـي حمامـا
....................... وَرْقا اتْحَسَبْنِي من بلاي اشْجرة كِين
زولي يشابِه للشجر .. بس أنا مـا
....................... فيني خضار ٍ يجذب الطير شوفيـن
كلِّـي شحـوب و لا عليَّـه ملامـا
....................... لو قلت لك ابندفن بِك على اهْويـن
يمكن تعلَّق فـي ضلوعـك يتامـا
....................... عانت .. تدوِّر بـالأوادم عناويـن
هذا احتياجي ..و السـلام السلامـا
....................... على حبايب مييتـن ٍ مـن اسنيـن
[ ما هو شعر هذا حكي قلْبي وحبيت اكتبه .. ]
.
.
ناصر حطاب الدهمشي