[نواف التركي]

[POEM="font="Simplified Arabic,5,blue,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]حارس الليل مانامت عيون الخفير=وانت عقب استلام البرج جاك استلام
خاونى كان نومك عنك فى قاع بير=ننفخ الهم دخانٍ يطير بسلام
هاجرن الطيور وجف مى الغدير=ويمكن الريح باكر ماتجي بالغمام
ودى اكفخ على غيمه صبيه تطير=يم أرضٍ بها قتل المشاعر حرام
كل ماهب منها فى خيالى عبير=صرت كنى كذا مانى على مايرام
وانت مثلى حزين وفيك وجدٍ كبير=كن بينك وبين أحباب قلبك خصام
هات دمعك أبـ /ابكى به على مايثير=خاطرى بالحنين وضامرى بالهيام
لى ورا نجمة الجوزا حبيب وعشير=واهل كانوا أهل واعمام كانوا عمام
طير روحى تركته فى بلادى أسير=واهنى من يموت بديرته لو يضام
عشت فيها صغير ورحت عنها صغير=أذكر البدو خلوا بالمراح الحمام
كنت ابيها وكنى كنت احاول اثير=بالحجر حس مات من الف عامٍ وعام
شب شيبٍ بقلبى من كثر ما أسير=عقب موت الامانى دون هدى ومرام
عمرى اللى سرح بى فوق ظهر البعير=صار كنه على ظهرى شداد وسنام
ليتنى ماكبرت وماعرفت المصير=وماسكنت المدينه فى بقايا حطام
ضيقةٍ يلعن الله من بها يستجير=فى بيوت الردايا لوّها من رخام
ذاك امير الليالى يعرف انى امير=لى على متنه وصدره نجوم ووسام
مار وش حيلة اللى بين ربعه فقير=لاجواده جواد ولاحسامه حسام
بندقى كنها بين البنادق جفير=خاسرٍ من بها شد الظهر والحزام
لايغرك اسم عمك اذا ما يفير=الرصاص ان فسد يصبح خنافس ظلام
بأى جحرٍ ربا هذا الضرير الحقير=فى يدينه عيونى احتريها تنام
كم وطانى وعذبنى ورمانى حصير=ثم كّبر على صدرى وصلى وصام
يحسب انى متى ماجعت فيه استخير=عند هذا تبيّن مكرمات الكرام
تشبع الفار حّبات التبن والشعير=كل حين حسب قدره قنع فى طعام[/POEM]




فالح الدهمان