[سلطان الوثر]

جيتها
والقلب توّه باخضراره
مايعرف الريح
ويدين الجفاف
لو مشى خطوة بلا لهفة يضيع
مايمدّ الشوف إلاّ في طموح
لين حطَّت دون دربي بيتها والباب والشبَّاك والضحك ورَغَدها والسكوت وكلمتين
كلمتين !!
ماتكفيني فضولي
ماتجاوب نبض قلبي
ماتوفّي كاسي الضميان لو قطرة نظر وآنا أشوف
وتصب لي صد وأشوف
واعطش ايديها وتشوف
كيف ماقدرت تروف
صدَّت ولدَّت نظرها
للمغيب
وانا عيني في سحرها
ماتطيب
من السَهر والليه
ياهذا السؤال الليه
يا اوسع ابواب الجواب
وش ذنوبي لو سئلت من الظنون
ليه كنت وليه لايمكن تكون تحبنّي حدَّ الجنون
وما أمون ؟؟