[شوق علي]

ذولا الرجال يقال حصنٍ مناكير ..
.. .. .. .. ما هم بحال كروش هي والكحيلة
إن اقبلوا خلوا حياتك نواوير ..
.. .. .. .. وإن أدبروا شاحوك من عند ذيله
ما ريضوا لمقطفات الأزاهير ..
.. .. .. .. يتلون غراة الجمال المحيله
فيضة بدل فيضة وقومك مداوير ..
.. .. .. .. وإليا لمع برقٍ جديدٍ تخيله
لو سندو لك عودوا بك محادير ..
.. .. .. .. حليلةٍ تمحى ليال حليله
يجفون حيل أيامنا والمعاشير ..
.. .. .. .. ماهم كثير الطيب يسوى قليله
مذهب حقوق الواهنات المصاغير ..
.. .. .. .. أثمار قلبٍ ما تحايل بحيله
كومة وراعينٍ تحج المعاذير ..
.. .. .. .. تصعب على بنت الحصان الأصيله
تطول بأحزان النفوس المشاوير ..
.. .. .. .. والدمع ما جفت شغايا مسيله
الرفق مخطي جامعين القوارير ..
.. .. .. .. يا ما سطوا في كل نفسٍ جليله
دايم ضحاياهم بنات المناعير ..
.. .. .. .. كم شيخةٍ حطوا عليها خبيله
لو كان واحدهم يقود الطوابير ..
.. .. .. .. عند الغنج وأم الغنج قل حيله
لو أنه أبو زيد وإلا أنه الزير ..
.. .. .. .. لو خزته طفلة غدا واحليله
لا لامح المهره يدوس المحاذير ..
.. .. .. .. ويروح عجه قاطبٍ مع صهيله
وإن جيتي بوجه تجيك الأعاصير ..
.. .. .. .. ينسف على الراس المعاند شليله
راح الحصان وجعلها له مسافير ..
.. .. .. .. باكر يعود لك تباريه عيله
إما اشلعي وادعي بقلبه مسامير ..
.. .. .. .. وإلا اصبري صبر القلوب الهبيله
علك الرسن ما فاد قبلك غنادير ..
.. .. .. .. وكم بالعنان من الحراير ذليله
ممدي له القانون حدبٍ مشاهير ..
.. .. .. .. ومع قوته يمده بكل خيله
فوضى وبالفوضى تضيع المعايير ..
.. .. .. .. ومدنع الغايه يهين الوسيله


حصه هلال [ ريميه ]