[مناحي النفيعي]

من شرفة العُمر طار القلب عصفور
....................... وحيد لا غصن باقي له ولا ظلّ !

وحيد حتّى من الوحدة و مذعور
....................... وجْناحه أثقل من الغربة و مبتلّ

يا طير أنا فاقد ٍ لوحة و طبْشور
....................... و استاذ صوته يلفّ الفصل و يملّ

و شبّاكنا اللي قِزَازه درب ممطور
....................... اللي معه ننظر الـ الغايب ولا طلّ

اشتقت للوقفة اللي وسط طابور
.......................اللي به أطوي مدى الأحلام و أفلّ

والبنسل اللي كأنه سيف مشهور
....................... كم مرّة أبتر به الـ كرّاس و آحلّ

اشتقت و الشوق بعض أحيان مسعور
....................... ينفّض الجفن لين دْموعه تْهلّ