صك براءة ..!!
 

أبا انجرف
مع هالموسيقى العارمة
بس اسمحولي
لحظة
وراجع
لو ان اللي ورى بحّات نايات الهوى
غرفة فارغة
من كل شيء
إلا الهوى
وصوت الهوى
ودمعات حي
كانت هنا
وكنت الوحيد
اللي انجرف

بس اسمحولي
باعترف
ماهو ضروري اللي نشوف .!!


[ اللي نحس ]

أنا وانا سلطان
شاعر جعل صمت المكان
أعذب من اصوات الأهازيج
وضجيج المهرجان

تخيلي ..!!
وقّفت مَرَّة عند شبّاك ..!

مَرَّة

ماهي مُرَّة مَرَّة

لكنها كانت عمر
وكنت أكْذَبْ من الطارق الغربي على الشبَّاك
طرق الهوا .. نقدر نقوم نطالبه " من إنت ؟ "
لكن ياهوى ،
كيف انت ؟ ،
لو ماكنت .....!

نزيف حاد
وشعور جاد
بالإنتحار

هذا كلام اللي سرى واقفى عن حدود النجوم من الفضا

لكن انا
لازلت اشوف ان الجدي
شاعر محيط
رغم اتهامات القمر بانه بسيط
ومبتدي ،
ولازالت
الجوزا تغيب ازمان
وازمان تحدي ..!

عمر الصناعة ما انجبت مخلوق يرعشه النسيم
ولا التكلّف بالحياة يواكب اجراس الزمان

ولا الخداع اطول عمر من بهجة الصدق الأليم
ولا الكحل ليل / وعيونك شمعه / وجرحي ضمان

بيني وبينك .. تفصل الشوق دمعه ..
اللي بقت في عينه دموع .. كذّاب ..!!