|
ودي أقول إني أحبك .. وخايف! مابين أحبك لين .. أحبك ، مسافه! في ذمتي لاشفت .. حمر الشفايف ! قلت النساء من بعد زولك ..حسافه! #سعيد_موسى |
سلمى .. وانا صدري مثل طير يعلى ! يطير فوق ، بعيد ... ويمشط الديم سلمى .. وكل آهه غدت فيك تسلى ! الله وكيلك.. فيك طفله من الغيم ! سلمى .. ويتناثر عطر .. سلمى .. ويتساقط مطر ! سلمى ويربكني سؤال ! الحسن ذا ممكن يُقال؟ بنيّةٍ من ناس .. ماتشبه الناس! مخلوقة الألماس! مليانة الإحساس ! سلمى .. ويحضنها الحبق! سلمى لها الورد .. العبق ! من طين هذي مثلنا ؟ أو رياحين ؟ سلمى .. وانا قلبي عطش ! للشعر .. ولهذا الرمِش ! سلمى ويتساقط جدل ! لين امتلى الشارع غزل ! اذا انطقت .. كن الحكي بستان.. به خوخٍ شهي ! سلمى .. اذا قالت أنا ! فزّ الحكي .. غيرك هنا ؟ ! |
كيف انام ؟ كل شي حولي ظلام .. كيف أنام ؟ داخلي زحمة ... حطام ! كيف أنام ؟ صدري به .. مثل الجمر ، والحكي .. اللي اندثر ! ماله عذر .. ماله عذر ! كيف أنام ، ووجهك أظلم والسيوف اللي بصدري ماارحمتني .. قطعتني .. واوجعتني ! وجرحي ابكم .. ماتكلّم ! علميني الليله هذي .. كيف انام؟ |
اغفر لي اني احبك ..
وآنا بغفر لك .. سوادي ! وإني حبي .. مثل ظلمى ! لاانتي شفتي ولااعتكزتي .. اغفر لي .. هالسواد ! وهالرماد .. وانا بغفر لك سهامك .. " روح عادي ، هو يضر الكون واحد" ؟ غيب .. عادي ! هالبلد كله أيادي ! وقفّت يعني .. عليك ؟ بغفر إني صرت .. عادي ! وان لو أرحل وافارق ! كل هذا الكون هادي ! يالحبيبه .. والحقيقه مثل موس .. تقط روس ! تطفي أيام وشموس .. يصبح العالم .. عبوس ! لفّي هذا الكون كله ! بحره وجزره ومده .. ريفه .. واصعب تلاله .. من جنوبه .. لي شماله .. وعلميني .. بعد مدّه ! من هو اللي حب كثري ؟ ومن هو اللي صان مثلي؟ ومن هو اللي شال صدرك .. مثل ماشال الحمامه بين كفه .. بكل عفه ! يالحبيبه ... صدري الأبيض .. تجمّر ! صدري المعشب .. تصحّر ! كيف مااغفر لك سوادي ؟ رغم إنه ابيض أبيض من حلم وأكرم اشمخ .. من قمم ! ربما .. غيرك يشوفه كل حلمه .. وكل شوفه ، لكن الأيام هذي .. مانبي الشخص النظيف ! مانبي الا السخيف .. مايعيش الا الرخيص .. ولا يقوم الا النقيص ! جرحك اللي هزّ جوفي . لينها أهتزت . كفوفي .. " إني عابر .. جيت عابر .. رحت عابر " مااصعب شعور المقابر ! ، بغفر جراحك ... وانتي داخل الله .. تغفري لي إني احبك .. هذا أكبر ماحملته .. هذا ذنبي اللي اقترفته ! |
الحب ذا كذبه كذبه بـ فمّ أطفال كل ٍ عطى قلبه وفرقّهم الترحال بنت افقدت لعبه وطفلٍ غدا رجال .. يالسهله .. الصعبه سهم الهوا قتّال ! كلٍ مشى دربه .. وتغيرت احوال ! أحدٍ طفى .. شهبه! والبعض منه .. رمال ! ماأجمل .. الكذبه ! في شفّة الاطفال ! |
وعن والدي أقول : يكفي إنه لا دعا قالت آمين : السما ! يكفي إنه لااعتزى! قال كلمه وأحتمى! ماهو عادي .. شي ماهو إعتيادي إنه لوحده بلادي |
يجيك من الزمن .. حادي ! وتنسينه .. وتتناسين .. شي عادي ! وهو باقي العمر .. باقي؟ كبرنا .. والزمن يكبر ! وانا ماشابت اوراقي ! دخيل " آحبِك " الأولى وهي تمشي وتتلعثم ! وأربّيها على يدي .. واكبّرها على صدري ! ولكن للأسف .. تكبر وتصبح عاقه بـ قلبي ! وغصه في وسط فمي! ولاتثمر! |
كل دمعه مرّت فْمي مالحه ..... ذقتها من قبل حتّى لاتفوت ! الجروح أحيان مو متصالحه ..... والكلام احيان في صدري يموت! شف شحوبي شوف عيني سارحه! ..... كم بهذا القلب هزّه دون صوت! يابن آدم .. والأوادم .. جارحه! ..... كيف أكون انسان في صدره ريموت! |
| الساعة الآن 03:58 PM |
Powered by vBulletin® Copyright ©2000 - 2025, Jelsoft Enterprises Ltd.