منتديات أبعاد أدبية - هنــــالك ...؟

.

.

.

سرى هم ولفى هم ونسى يسـري
لوى عنق الظلام ونوّخ الخاطـر

ندهت الليل قعّدته علـى حجـري
ورضّعته أسى امس وغثى باكر

تصبّب ياقلم بنت الـورق تغـري
وانا اللي بي كثير وصفحتي عاقر

تعال انحت على وجه الورق قبري
اواري به ملامح وجهي الطاهـر

تجي ساعه اضم من الوله شعـري
وساعه العن الأشعار والشاعـر

تعبت استر خطاي وْإلبسه عـذري
كرهت ارث السنين ولعنة الحاضـر

تعرّي يـ القصيده واهتكـي ستـري
تهادي في صباك وحسنـك السافـر

ابي لاعانق شفـاه البشـر ذكـري
يلوم اللي يلوم ويسخـر الساخـر

انا اللي بعت لـ يدين الزمـن عمـري
انا المغدور في حلمه وانا الغادر

شربت من الشقى لين امتلى صدري
هـمـوم ٍ مالـهـا أول ولا آخــر

سكتّ ولا نفع صمتي ولا صبـري
تعبـت ولا عليهـن كلّهـن قـادر

اعرف الصبر لا يلهي ولايبـري
واعرف الوقت لامنـّه جرح كافر

واعرف ان التعّري للبشـر يـزري
ولكنه يريّـح صـدري الزاخـر

ابـ اعلنها تجي من مـا درى يـدري
انا هالحين خاسر ويش انا خاسر

.

.

.

http://www.ab33ad.info/up/uploads/im...d65765d498.gif