؛



لا تغرقين الورد من جود السحاب
الورد ما يسوى .. يجرّحه الهدب !
،
أنا بـ صدري للحزن مليون باب
فلا يظيمك لو بكيت من التعب !

ليه آترجّى الغيم تمطرك بْسحاب
ليه آتصبّر بالدّمع وأرضي جدبْ ...؟

ليه ألمحك في كل وجه وكل باب
ليه أنتظِرْك وعقرب اللّهفة وصب ..؟!

؛


من قال لك: إنْ طينة أضلاعك يباب
وإنتِ يْتعرّش من على ضلعك عنب ؟!
،
لا والله إلا ناضحة بْـ عذب الشراب
وأنا الظمأ يلوي على فمي الشغب !

يا مبسَمه ما كِنت لي لثغة سراب
ولا كان لي وِزر الكلافة والتّعب

لا من لِمستك خانني صوت الصواب
من يِنجدْ الملهوف وقيودَه " كُرَب " ..؟

؛



عامين .. وعيونك بـ أهدابي كتاب
أتصفّحك ، وأتأملك نشوة و حب !
’
وأتخيّلك .. حتى أحس بـ إنسكاب
وأمررك في كأسة اللهفة نخب !

عمرين يا صمتَهْ..؟ أيا نكهة عذاب
ما عانق طيوفَه سوى حضن الهدب

تاخذني الأشواق وآلمّك ضباب
وأتنفّسك في رِبكة الفرقى بِحُب

؛


وش حيلة الملهوف من خوف الجواب
إلا السكوت اللي ورى ضلعه صخب !
،
كلْما هَمَم يبوح بـ اللهفة .. أناب
و ردّ صمته .. يشعله نار وحطب !

إن كان لك في صمت إحساسك صواب
آبسألك، كم في صوابك من تعب ؟

ليه الشعور يبور في حفنة غِياب
ليه الأماني شموع ذوّبها اللّهب ؟!